Zomi Siamsin Kipawlna

Dear Lawmte,

 

Zomi Siamsin Kipawlna - Mandalay pan Siamsinte a beisa July 3, 2010 (Saturday) ni in Kawlgam kumpi' khuapi thak ahi NyiPyiTaw (NPT) ah excursion va pai thei uh hi.

Paina ah ZSK-Mdy pan Siamsin mimal 25 kihel a, Siamsinte lawm 3 tawh avekpi in 28 kipha hi.

July 2, (friday) 21:94 Pm Meileng tawh Mandalay pan NPT lam kizuan a July 3 (sat) 04:30 Am in NPT meilengphualpi kitung hi.

Ciah nading meileng ticket zong 9:00 Am in NPT meilengphualpi ukpipa kiang ah kilei aa, bang mah haksatna om lo in hong pia pah hi.

"Ko Tedim-Chin Medical le Nursing le University tuamtuam pan siamsinte hi ung, ka ciah na ding ticket haksa ahih man in hong vai hawm sak nading hong thum ung" cih official lai tawh kigelh in nget kul hi.

 

Sun sung teng in mun thak teng ahi, National Landmark Garden, Zoological Garden (NPT) le Water Fountain Garden te ah kihawh kawikawi in,

 

National Landmark Garden pen Kawlgambup gamlim bang in akibawl hi a, Sate and Division tuamtuam om sak hi. Tua khat tek ah kimawlna tuamtuam zong om pah hi.

Lutma mikhat 1000ks hi. A sung ah khe tawh pai ding hi leng koi mah kitung zo lo ding ahih man in, mawtaw neu kiekeu te sap kul hi. Mi khat ciang Nai 1, 1000ks ta la uh hi.

Chin State a kicihna mun ah i Rih bual om in, tua tak ah kimawlna khat om sak hi. Zopuan tuamtuam asilh milim golpi tuamtuam zong ki koih hi.

 hun tawh kizui in sum beibei dan ahih man in nai 2 sung bek ka om uh hi.

 

Zoological Garden pen singkung atam pian na mual tawh akinai na mun ah kibawl hi.

Garden sung alutna ticket leina ah ei Zomi nasemte om ahih man in hong amau hang in hong noptuam mahmah hi.

Ganhing tuamtuam te kimtak in koih uh a, mawtaw neu te mah tawh pai kuul hi. Hih tak ah bel mi khat 500ks bek tawh a vekpi ki mu thei hi.

 

Water Fountain Garden pen nitak nitum khit ciang in kitung hi. A huang bup ah water fountain tampi tak koih uh a muh nop mahmah hi.

La ki hong in tua la tawh kizui a tui te hong lam ziahziah sak hi.

 

Kawlgam khuapi thak a om gardente nasiatzia te kien kawi kawi a, kimawlna tuamtuam zong kimawk thei ung.

Garden khempeuh pen Kawlgam sung ading in athupi pen ding in a kibawl a hih man in zai mahmah hi.

Tua tak mah ah, Tui tawh Movie lak theih na zong bawl uh ahih man in muh nop kisa hi.

 

Hih Garden te pen mun khat le khat kikal gam la mahmah a mawtaw tawh min 20 tang bang ki pai hi.

 

Nitak nitum kuan lam in, tulaitak a kilam thak Kumpi zumpi innthakte, kumpi nasemte innmunte ka en uh hi.

Maikum ciang in a kizangh ta ding ahi Lord-Daw (Parliament) zong ka en uh hi. A gei ah kipai thei nai lo ahih man in agal pan in bek ki en thei hi.

A lam dang khat ah Parliament innpi pai nading ah Lei (Khau-lei) khat kitawn ding in bawl uh hi.

"Vai khat peuhpeuh a kisap ciang hih lei pan akhaktan theih nading hi in teh" ci in Siamsin khat in amuh na gen hi.

Siamsin khat in zong, "Hih Garden khat ading akizang sum teng bekbek tawh i Zogam puah leng lampi khempeuh concret hi zo in teh, tuk le khal in ki pai zo ding in um ing" ci in a muhna gen hi.

Tua tak a om a khuami khat in mun khat ah Sente in hotel pi khat lam uh, dawl 20 bang sang ding ci" in hong gen hi.

 

Nitak lam in meileng phual ah ka pai kik uh ciang in, mawtawl hawl pa in hong deihsak lua ahih man in, Shwedagon tawh kibang linlian in bawl uh Pagoda ah mawtaw hong hawl pih hi.

Ko zong mawtaw tung ah Pasian la sa kawm sa in a taattung uh ka et sak uh hi. Amau ading in thupi sak tuaktuak mahmah uh hi. Shwedagon sang tawmcilik neu zaw hi ci uh hi.

 

Nitak nai 8:30 in Meilengphual ka tung kik uh hi. Hun ngah ka hih man un, social gam ka kimawl uh hi. Khomkhat sung ka kimawl khit uh ciang in,

galkap khat thau pua kawm in hong pai litlit in, "Hih tak ah kimawl kei un, gam lum kei un, ka tung aten deih lo hi, ka pang hong kibeng ding hi"

hong ci ahih man in ka khawl uh hi.

 

Nitak 10:30 ciangin NPT-MDY meileng thak tawh MDY lam kazuan kik uh hi. Hih meileng ah Upper ka ngah uh hi. Upper Class pen kawlgam sung a meilengte lak ah ahoih pen ding in a bawl uh

hih tuak hi. Air-con vot sak mahmah, Kong khak te pen amai ah ding leng amah le mah hong kihong cih khawng, a mei khawng taangsak zeizai cih khawng tawh, ko Siamsinte khua dam thuak kawmkawm in July 4, 2010 zingsang nai 5:30 in MDY cidam in ka tung kik uh hi.

 

NyiPyiTaw pen alampi te hoih thei mahmah hi. Kawlgam ah a hoih pen hi ding hi.

A hih hang in hih lampite tung ah mawtaw tawm hi. Zum mawtaw le Innlam mawtawpi te tam hi.

Garden tuamtuam te le Shopping mall te zong nasia thei mahmah hi. A hih hang in a lei tawm in, a en tam hi.

A lei pen Kumpi zalian te le Yangon pan hong pai sum bawl teng hi zaw ci uh hi.

Mi zong tam semsem hi. Mei pen mit ngei lo ci hi.

 

Photo tuamtuam te pen lawmte Muanpi, Sumpi ,Zeelpi, Khualpu te facebook ah ki-en thei hi.

Zingsol tanute