Zomi Siamsin Kipawlna

A Khat veina Siamsin Summit Meeting Lawhcing:

May 28-29 ni-in Mandalay Happy Family huang ah Kawlgam bup Zomi Siamsin Makaite Khawmpi Lawhcing takin kibawl zo hi. Hih khawmpi ah Kawlpi pan Makai mi 10, Monywa pan 2, Mandalay pan 20 le Yangon pan 5 kihel theih uh a, Magwe Siamsin pan makaite hong kihel zo lo uhi. Gambup Siamsin Kipawlna  a phuan khia Michael Suan Lian Pau, IT Sut Mung, Dr Pau Sia Lian le Dr Nung Mun Thawn-te zong kihel thei uhi.

Hih khawmpi ah mailam kalsuanzia ding tawh kisai anuai-a bangin thu kikupna le khensatnate kinei hi.

1. Thukhunpi Gelh Committee in kha 6 sung hunla-a a gelh Kawlgam bup Siamsin Thukhunpi le paiziate Kipsakna kinei hi.
2. 2008 a 2 veina Siamsin Seminar le 2009 a 3 veina Siamsin seminar pan mipi thukimna tawh a kikipsak 2010 kum a Zangkong ah akibawl ding 4 veina Siamsin Seminar pen Zangkong Siamsin lam pan lemlohna tuamtuam tawh innteek la zolo ding uh ahimanin, Tongzang khuapi ah 2010 Nov 22-26 sungin bawl dingin kikhel hi.
3. 2011 April kha sungin gambup Siamsin min tawh Medical trip pai ding le amakai dingin Dr Pau Sian Lian, Dr Nung Mun Thawn le Dr Sian Nun Siam-te kiseh a ani kicianin hong tangkokik ding uhi.
4. 2010 Nov kha sungin Tedim ah kibawl ding CCJC pawipi lapin Siamsinte in zong Cope topa pahtawina dingin nasep 2 gelna kinei hi. Khat pen Mikang Movie-te ah Zolai Subtittle guan ding hi a, a sem dingin Mandalay Siamsinte kiseh hi. A 2 na pen Zolai Electronic Dictionary bawl ding hi a, a sem dingin Michael Suan Lian Pau, Dr Pau Sian Lian, Dr Nung Mun Thawn, Dr Sian Nun Siam, Tg Cin Suan Kap le Lia Niang Sian Ciang -te kiseh hi. Hih Dictionary bawlna ah Era Electronic Company Limited tawh khop in kibawl ding a, tua sung ah English to English, English to Myanmar, Myanmar to English le English to Zolai, Zolai to English cih Dictionary nampi 5 kihel ding hi. Khat ciang ks 40,000/- man dinga amasa in 100 bek kibawl zo ding ahimanin a deih dingte in makaite tungah ki-order khol theita hi.
5. 2011 Calendar bawl ding, T-Shirt bawl ding le adang siamsin activity tuamtuamte angeina banga bawl ding thukimna kinei hi.

Thu kikupna ah khat le khat kisuanna omlo takin kikum ziahziah, kinial ziahziah bek tamloh makai luite zong hong kihel ahimanin nuamsa mahmah ung ci'n Kawlpi pan makai khatin gen hi.

By~ Siamsin

Comments (0)