Zomi Siamsin Kipawlna

KUA HANG HI ZAW HIAM? (1)

Mi hing I cih pen khat bek kiom thei lo a, lawmlegual, kimlepam tawh kiom khawm ciat hi. Tua mun ah lawm hoih, kimlepam hoih a om mahbangin a hoih lo zong tam mahmah hi. Mi hingte pen a hoih lam ah kipattah ding a hamsat mahmah hangin a sia lamah kizelsuah ding baih mahmah hi.Mi hoih sangin mihoihlo zong a tamzaw ding tawh kibang hi. Adiakdiakin Khangnote sung ah nulepa thumang migina kitawm semsem a, vakthap zukham ankham kitam semsem hi.Tua bang a I ginat loh ciangin atamzaw in lawmlegual, kimlepam peuh kimawh sak thei hi. Nulepate mahmah in zong ka ta thumang napi a lawmte zelsuahin lal(pyat) hi ci thei uh hi. Pawl khatte belh zong hithei kha mah ding hi. Ahizongin avekpi in man khin in ka um kei hi. I lungsim ngaihsutnate kien pha dih ni  I pu I pa te in Sial vom le Sial vom kingai cih paunak na nei hi. Mi gina, mi citakte pen, a mau tawh lungsim kibang, ngaihsutna kibang, ngimna kibang teng mah tawh ki-it kingai in, kikhawl uh hi. Lam khat pan gen leng, mi gina dingte, mi citak nuamte pen, mi gina, mi citakte omna, kimlepam ah va pai, va kihela, tua bang mite tawh kikhawl, om khawm nuam sa uh hi. Tua bang a mi ginate kikholh khopna mun ah, mi gina lo khat va lut zo tuan lo hi. Migina lo dingte pen migina lo teng mah tawh hong kikhawl pah hi. Amau teng mah a thu uh zong hong kituak pan lianlian bilbel hi.

Tua man in ei le ei kisittel dih ni. Miginalote tawh omkhawm nuam I sak a, I lungsim sungah lungkimna a om leh ei zong migina lo mah I hi pah lel hi. A omsa migina lo hon khat hang a ei migina lo a suak I hi kei a, ei mah gina lo I hih man hi zaw hi. Nulepate in zong na tate uh a gina pha lo a om khak zenzen leh a lawmte zelsuah hi ci kei zaw un la, a mau mahmah gina lo ahimana miginalote tawh akikhawl ahihzawk lam phawk ding kisam hi. Ei khangnote in zong, "ka lawmte hangin ka tuacikha hi, tua bangin ka gamta kha hi" cih kammal I zat theih zel pen maizum huai hi. Lawmte hang hilo zaw in ei mahmah ginat loh man na hi thei zaw hi. I ginat nop leh miginate tawh kikhawl ding, kithuah ding hang a, miginalote pelh ding hi lel hi. Kua hang hi zaw hiam?

I kim I pam ah miginate le miginalote nam 2 na om khin a, ei kuate tawh I lungsim a kibang hiam? Ei teel ding hi lel hi. Amau ei hong teel masa lo ding hi. Miginalote I teel a a mau tawh I kithuah leh ei zong miginalo hipah lel a, a teel eima mawhna hi zaw hi. Miginate I teel a, amau tawh I kithuah leh ei zong migina I suak ding a, ei ma khensatna bangbang ahizaw hi.

Zomi Siamsin Khangnote a teelsiam dingin kong lamen hi.

Comments (1)

...
written by Tg Mang Sian Mung on August 20, 2010

Na article hoihsa mahmah ing.
Ken bang bel hong thukim mahmah ing.
Khangnote pen khat veivei teh amau hang mah hi cih ding ngamlo uhi.
Lawmle gual mawhsak thei uhi.
Miginate tawh kithuah nop leh ei leh ei gina takin om masa photphot leng
hoih zawin um ing.

report abuse

vote down

vote up

Votes: +0